Opisyal nang nagsanib-puwersa ang London-based label na Chopova Lowena at ang iconic na British footwear brand na Dr. Martens para sa kanilang kauna-unahang collaboration. Unang nasilayan sa runway ng Chopova Lowena, pinagsasama ng three-piece capsule na ito ang folkloric at punk-infused na disenyo ng brand sa heritage at craftsmanship ng Dr. Martens para sa isang pambihirang collaboration.
“Kinakatawan ng aming tatlong istilo ang rebelyon at galak na sentro sa Dr. Martens at Chopova Lowena,” bahagi ng mga co-founder na sina Emma Chopova at Laura Lowena-Irons sa isang press release, habang ibinabahagi ang kanilang panghabambuhay na pagmamahal para sa maalamat na footwear brand.
Binigyang-buhay muli ang Aurix silhouette gamit ang custom red tartan, indigo faux fur, leather, at ang classic na yellow welt stitching kaya ang lineup na ito ay sadyang ginawa para sa pagrampa. Nangunguna sa release na ito ang Aurix Hi LLT, isang statement knee-high boot na pinalamutian ng mga nakalawit na butterfly charm. Para sa pang-araw-araw na porma, ang Aurix 5i ay nag-aalok ng square-toe, five-eye lace-up na may leaflet charms sa bawat eyelet, habang nire-rework naman ng Aurix MJ ang classic na Mary Jane na may makapal at double-strap na butterfly buckle.
Bumibida sa campaign na kinuhanan ni Emily Lipson ang lead singer ng Amyl and the Sniffers na si Amy Taylor, na nagbigay-buhay sa isang gothic na “Bulgarian Cinderella” suot ang mga signature silhouette ng Chopova Lowena.
Mabibili ang Chopova Lowena x Dr. Martens collection simula Nobyembre 19 sa Chopova Lowena at mga website ng Dr. Martens at sa ilang piling retailer.
Sa iba pang balita, naglunsad ang Moon Boot at Guest in Residence ng isang bagong collaboration.